---

ઓખાહરણ-કડવું-૭૦  (રાગ-ઢાળ)
ગરુડ અનિરુધ્ધને શ્રીકૃષ્ણ પાસે લઈ આવે છે

ગરુડ ત્યાંથી પરવર્યો, એક નદી આવી અશેષ;
તેમાં તેણે ચાંચ બોળી, પાણી પીધું વિશેષ.

ત્યાંથી આઘેરો પરવર્યો, જ્યાં ધગધગતા અંગાર;
પાણી પેલું પીધું હતું તે, વાપર્યું તે ઠાર.

ત્યાંથી આઘેરો પરવર્યો, જ્યાં ભૂત ને પ્રેત;
પાંખો મારી પાડિયાં, કીધાં સરવે અચેત.

ત્યાંથી આઘેરો ચાલીઓ, કુંવરને કોટે નાગ;
નાનાને આખા ગળ્યા, મોટાના કર્યા બે ભાગ.

ભલું થજો ભગવાન તમારૂં, પૂરણ પામ્યો આહાર;
કુંવરને મુકાવી લાવ્યો, જ્યાં છે જુગત આધાર.

ઓધવ ને અક્રુર બે હસીઆ, ભલા કૃષ્ણના તન;
તમે રે આવ્યા પરણવાને, અમને ન લાવ્યા સંગ.