---

મેરુ તો ડગે, જેનાં મન નો ડગે… પાનબાઈ…

મરને ભાંગી રે પડે ભરમાંડ રે,

વિપતી પડે તોયે વણસે નહિ ને રે,

શો ઈ હરિજનનાં પરમાણ રે.. મેરુ રે..

ચીતની વૃતિ રે જેની સદા રહે નિરમળી રે

કરે નઈ કોઈની રે આશ..

દાન દેવે પણ રેવે અજાચીને

રાખે વચનમાં વિશ્વાસ…

હરખ રે શોકની ના’વે જેને હેડકી ને

આઠે રે પહોર રે રહે આનંદ

નિત્ય તો રેવે સતસંગમાં રે

તોડે રે માયા કેરા ફંદ

તન મન ધન જેણે ગુરુને રે અર્પ્યા રે

અરે એનુ નામ નિજારી નર ને નાર

એકાંતે બેસીને અલખ આરાધે તો

અલખ પધારે એને દ્વાર

મેરુ તો ડગે, જેનાં મન નો ડગે… પાનબાઈ…

મરને ભાંગી રે પડે ભરમાંડ રે,

એજી સંગત્યુ કરો તો રે એવાની રે કરજો રે

ભજનમાં રે રેજો ભરપુર

ગંગાસતી… એમ બોલ્યા ને

અરે જેના નયણુમાં વરસે ઝાઝા નૂર

મેરુ તો ડગે, જેનાં મન નો ડગે… પાનબાઈ…

મરને ભાંગી રે પડે ભરમાંડ રે

વિપતી પડે તોયે વણસે નહિ ને રે,

શો ઈ હરિજનનાં પરમાણ રે.. મેરુ રે..

– ગંગાસતી