---

ઓખા ઉમિયાજીને શાપનિવારણ માટે વિનંતી કરે છે

ઓખાહરણ-કડવું-૨૯  (રાગ-સાખી)

ઓખા કહે અમે પેઠાં પાણીમાં, તરવા તુંબા ગ્રહ્યાં;

હું આવી સમુદ્ર વચમાં, તુંબા ફુટી ગયાં.

 

ઓખા કહે છે તરસ લાગી મારા તનમાં, સરોવર તીરે હું ગઈ;

પીવા ઝબોળી પાય, મારાં ભર્યા સરોવર ગયાં સુકાઈ.

 

આણી જ તીરેથી અમે અળગા ન થયાં. પેલી તીરે નવ ગયાં;

કરમ તણે સંજોગ અમે, મધ્યે જળ વચ્ચે રહ્યાં.

 

હું તો આવી ઇશ્વર પૂજવા, સામો દીધો શાપ;

પરણ્યા પહેલા રંડાપણુ થયું, મારાં કીયા જનમનાં પાપ.

 

ઉમિયા તું તો મારી માવડી, છોરૂં છે ના દીજો છેહ;

માવિતર તમો કેમ છૂટશો, હું તો પુત્રી તમારી તેહ.