---

ગોર્યમા પાસે માંગણી

ઓખાહરણ-કડવું-૨૬   (રાગ-ધોળ)

ગોર્યમા! માંગુ રે, મારા બાપનાં રાજ;

માતા સદાય સોહાગણી .

 

ગોર્યમા! માગું રે મારા ભાઇનાં રાજ;

ભાભી તે હાથ હુલાવતી.

 

ગોર્યમા! માગું રે મારા સસરાનાં રાજ;

સાસુને પ્રજા ઘણી.

 

ગોર્યમા! માગુ રે, દિયર જેઠનાં રાજ;

દેરાણી જેઠાણીનાં જોડલાં.

 

ગોર્યમા! માગું રે, તમારી પાસ;

અખંડ હેવાતન ઘાટડી.

 

ગોર્યમા! માંગું રે, હું તો વારંવાર;

ચાંલ્લો ચૂડોને રાખડી.

ગોર્યમા! માંગું રે, સરખાં સરખી જોડ;

માથે મનગમતો ધણી.